دليلك الأفضل لتكوين عصابتك..!

إيليا إمامي ||

على طاري الفقر والفاشينستات والضباط الفاسدين ..

هاي النماذج الي تطلعلنا يوميه يمشي و وراه عشرين واحد حماية

هذوله العشرين منين ؟

بيش اشتراهم ؟

وشگد منطي للواحد ؟

تلگه الواحد بيهم مشايف بحياته
ينطونه قاط أسود ونظارة حتى يطلع مسلسل وادي الواوية
وثلث ورقات بالشهر يبوسهن ويخليهن بجيبه ..
خو إذا وياها مسدس وهوكي توكي يبيع أمه وأبوه ودنياه وآخرته.

والان دعنا نحسب تكاليف (كيف تصير شخصية مهمة وراك حماية)

ثلث ورقات راتب x عشرين نفر = 60 ورقة

قاط أسود شايل روحه 50 ألف x عشرين نفر لمرة واحدة في السنة = 7 ورقات

مسدس غلوك مستخدم 500 $ x عشرين نفر = دفتر.

جهاز هوكي توكي تغطية 2كم سعر الزوج 35 الف x عشرين نفر = گول 5 ورقات

النتيجة = تحتاج أقل من دفترين حتى تكون ستاف كامل من الحمايات لشخصك القيادي

وكلما تزود فلوسك تگدر ترفع مستوى التجهيزات أو عدد الشباب أو رواتبهم ..

ونفس الكلام عن المكاتب الإعلامية والصفحات الي تنادي بأسمك.

لذلك أنصح الطبقة السياسية أن تبقي الوضع على ماهو عليه

لأنه ببركة الفقر والبضاعة الصينية نگدر كلنا نصير رموز

لأنه إذا أشتغلت الوظائف والتعليم الزين وتوفرت الأموال .. تصير القضية صعبة.

ملاحظة: ما حسبت السيارات لأن إذا عندك 20 تگدر تاخذهن هدية من الميناء.