محمد باقر الصدر “قدس”..!
كاظم سلمان ابو رعيف ||
ينقل أحد المؤمنين
قائلا :-
قبل ١٥ سنة تقريباً التقيت أحد المشايخ من كبار السن وصار بيناتنا حديث حول مستقبل الشيعة في العراق ومعاناتهم والمصائب والصعوبات و المشاكل اللي يتعرضون الها من سنين طويلة وهم يجي يوم يرتاحون ويعيشون بسلام وأمان واستقرار ؟؟
گال هاك اسمع هاي السالفة وانت من خلالها تگدر تستنتج وتعرف مستقبل الشيعة في العراق والحديث للشيخ .
إيگول في سنة ١٩٧٩ وبعد خروج الإمام الخميني قدس سره الشريف من العراق بعد استشهاد ابنه السيد مصطفى الخميني رحمه الله تعالى على يد السافاك بمساعدة البعثيين طبعآ انتشر خبر في الشارع العراقي مفاده هو أن السيد محمد باقر الصدر قدس سره الشريف يريد يغادر العراق فصار نوع من القلق والفزع بين أوساط المجتمع الشيعي بخصوص هذا القرار المفاجئ.
يگول علی هذا الأساس صارت جموع المؤمنين تتوافد على برانية السيد الصدر قدس سره الشريف حتى يتأكدون من صحة الخبر .
إيگول آني هم حالي حال الناس هم رحت أتأكد من الخبر إيگول بعد وصولي البراني السيد بوقت قصير والسيد ماچان موجود بالبراني واذا بإعداد كبيرة من الناس يدخلون إلى براني السيد بحيث المكان ماإتسع الهم لأن براني السيد كان مساحته قليلة لذلك صاروا ايگعدون على شكل صفوف في وسط البراني وبعد شوية السيد نزل واستقبلهم ورحب بيهم وعرفوا السيد بأنهم وفد من بغداد يتكون من أغلب طبقات المجتمع يضم أطباء ومهندسين ومعلمين ومدرسين وأصحاب المهن جايين اليوم يتأكدون منك سيدنا صدگ تريد تغادر العراق وتعوف الناس اللي ٱمنت بمشروعك الجهادي وتتركهم تحت رحمة البعثيين .
إيگول السيد بس سمع كلامهم صار يبچي بحرقة وألم وگال مستحيل اعوفكم انتم أهلي وناسي واطمئنوا اني ولدت في العراق واستشهد في العراق .
إيکول من سمعنا كلام السيد كلش فرحنا كثيرآ ودخل السرور إلى قلوبنا وبعدها تقدم أحدهم وسأل السيد هذا السؤال ( سيدنا شنو مستقبل الشيعة في العراق حسب رأيك)
يگول أطرق قليلآ وگال اسمعوا هذه القصة وإن كانت من الخيال ولكن تستطيعون أن تحصلوا منها على جوابآ لسؤالكم .
يگول والكلام للسيد قدس سره الشريف في يوم من الأيام إجتمعت الأخشاب بمختلف أنواعها وتساءلوا بينهم الى متى نبقى تحت رحمة الإنسان مرة يسوينا كنتور ومرة يسوينه كرسي ومرة سرير ….الخ ومرة يحرگنه.
لابد أن يكون النا موقف ونتوحد ضد الظلم والطغيان اللي يمارسه الإنسان .
يگول اتفقوا يسوون مؤتمر ويدعون جميع انواع الأخشاب حتى يطلعون بنتيجة موحدة تحميهم وتحفظ وجودهم .
وحددوا موعد للمؤتمر وإجه اليوم اللي حضرت بيه جميع انواع الأخشاب.
ايگول اول من ارتقى المنصة خشب الصفصاف گال اني أنمو بجنب الأنهار أمتاز بطولي الفارع لاتكسرني الريح أميل معها حيث تميل وأخذ يتحدث عن نفسه ومميزاته .
وبعده ارتقى المنصة خشب الجاوي وايضآ تحدث عن مميزاته كونه يمتاز بالقوة والندرة وتصنع منه ارقى انواع الأثاث .
وهكذا الحال مع بقية الأنواع الجميع تحدثوا عن أنفسهم ومميزاتهم .
إيگول لم يتبقى إلا خشب الصندل وصعد إلى المنصة وفاجأ الجميع بأنه لم يتحدث عن نفسه بل وجه سؤاله إلى الجميع قائلآ .
المنشار الذي يقطع الخشب إيده من شنو صنعت ؟؟. الجميع گالو من خشب .
گال تمام والفأس گالوا ايضآ إيده من خشب .
گال والمعول گالو هم من خشب .
والچاکوچ گالو من خشب.
وعود الشخاط اللي يحرگ الخشب گالوا من خشب .
گاللهم إذآ مستحيل يتغير حالكم إذا ماتتخلصون من كونكم ادوات بيد الإنسان لأذية بعضكم وتكونون أحرار .
إيگول النوب السيد سأل الحضور گاللهم البعثي اللي يكتب التقارير عليكم منين ؟
گالوله شيعي .
گاللهم الشرطي أو ابو الأمن اللي يجي يعتقلكم منين ؟
گالوله شيعي .
گاللهم المحقق اللي يحقق وياكم ويعذبكم منين ؟
گالوله شيعي .
گاللهم الجندي منين ؟
گالوله شيعي.
الإنضباط منين ؟
گالوله شيعي.
وأخذ يعدد بهاي الأدوات والحضور يجاوب بأنهم جميعهم شيعة .
بعدين السيد قدس سره الشريف گال خلاصة الموضوع إذا ما تصيرون احرار وتتخلصون من كونكم ادوات بيد الجلاد مستحيل يتغير حالكم وتعيشون بسلام وكرامة .
محل الشاهد احنه هسة اللي يطعنون بالشيعة ٩٠ % من الشيعة
واللي يتجاوزون على المرجعيات الدينية ۹۰% من الشيعة
واللي يمدحون بصدام والبعث الكافر ۹۰% من الشيعة
واللي يطعنون بالمقاومة ٩٠% من الشيعة
واللي يطالبون بحل الحشد ۹۰% من الشيعة
والقائمة تطول .
مادام هاي الأدوات موجودة مستحيل يتغير حالنا وسلامتكم .
اقرء ايضاً
