كاريكاتير علي عاتب..!

علي عاتب ||

أبو كاطع بگراج بغداد يريد يرجع لبيتهم بالديوانيه..
إجه عليه واحد من بعيد وحضنه وصاح:
أبو عوده؟.. صدگ چذب إنته ببغداد وآنه ما أدري؟!
ليش محد خابرني؟.. آنه ما أنسى فضلكم من چنت جندي بالديوانيه وأجي وي عوده آكل وأشرب وياكم؟..
أم عوده شلونها، عوده والولد شلونهم؟
أبو كاطع گله: عمي إنته مشتبه، آنه مو أبو عوده؟
گله: شلون مشتبه.. ياما گعدنه، وأكلنه وشربنه سوه ببيتكم..
هسه تجي وياي للبيت..
گله أبو كَاطع: بويه آنه راد لأهلي.. عود غير نوبه، من أجي لبغداد أجيكم..
گله : ما تمشي إلا أغديك وذاك المطعم مو بعيد !.
أبو كاطع گال بگلبه (شخسران خلي أضرب الغده والحگ أرد لهلي)..
راحوا للمطعم، ونفرين قوزي وملحقاته وذيچ الخدمه الزينه !
المعزب گله: أبو عوده أنته كمل چايك وآنه أروح أحاسب أبو المطعم.
مرت نص ساعة وصاحبنه ماكو!؟؟..
گام أبو كَاطع سأل أبو المطعم على صاحبه،
گله صاحبك أخذ خمس نفرات قوزي سفري وطلع وحسابكم صار ١٢٠ ألف دينار وهاي القايمة !!..
گله: عمي قايمتيش الزلمة هو عازمني؟!..
گله: حجي شبعانين من هاي الدالغات، تدفع لو أخابر عليك الشرطة.
أبو كَاطع نبش جيوبه كلهن يلله سد الحساب..
طلع من المطعم ينكَت بعباته ويدردم:
(أبن الچلب أگله آنه مو أبو نعال.. يگلي لا أنته
أبو نعال).
رباط سالفتنه..
تشكيل الحكومة الجديدة بعد عزيمة العرس الإنتخابي.. ولائم، ودعايات، وصفقات.. وصرفوا المليارات، وتاليها بعض السياسيين تقاسموا الحكومة بيناتهم (هاي إلي وهاي إلك)..الوزارات والمناصب والمنافع وحتى المنافذ، وديحوا المكَرود أبو كَاطع بالكَنافذ.
علي عاتب