من “كلاوات” الساسة الأمريكان..!

قيس العجرش ||

بعمر 18 سنة أصيب بحادث سيارة، وصار مُقعد على الكرسي، وصار متديّن كلش. بعدين هذا التديّن حتى ما يروح ابلاش، راح اشتغل بالسياسة وية الحزب الجمهوري.

وضبطت الشغلة وياه، وانتخبوه عضو بالكونغرس عن كارولاينا الشمالية، رغم صغر سنّه.
لكن خطابه متشدد ومتديّن وطائفي وعنصري(بمعنى عرقي منحاز) يبدو أن الاخ وجد في عصر الأنترنيت والسوشيال ميديا ،دربونة يسوّق بيها دعوته وخزعبلات المتدينين المتطرفين بالحزب الجمهوري.

صار من أشد المناصرين لحمل السلاح، وللتدريس الديني بالمدارس، والموقف من إسرائيل ، وهواي شغلات غيرها، كان الحزب الجمهوري يربطها بالدين وبإرادة الرّب(مثل أي حزب يميني متطرّف). المهم ..

الاخ عضو الكونغرس، اسمه (مادسون كاوثورن) يكول:
” هاي إدارة بايدن تريد تطرق الابواب على الاميركيين حتى تلقحهم ضد الكوفيد. وهاي الإدارة(والقول مازال له) أكيد راح تطرق الابواب بعدين حتى تسحب أسلحتنا. وبعدين راح تطرق الأبواب حتى تسحب(الكتاب المقدس) من إيدينا!…….”
لا يا كلاوجي على هالربط !

التفكير المنحرف ماله علاقة بالتطوّر التكنولوجي، له علاقة فقط بعدد الأغبياء المتطرفين المتوفرين حتى يصدقوه ويستمعون له.

هذا اللي خلا كائن ما عنده أي شيء محترم في حياته مثل ترامب ممكن يصير رئيس لدولة عظيمة.