هاك روحي …!

قيس النجم ||

هاك روحي وجيب ميزان السعادة وشوفها
تكفي توفي بذمتي
وهاك عيني وشوفها اشكد تهوى عينك
فرحي أنت وسلوتي
صعبة لحظات الحزن بفراكم
وانت يمي هيج تكمل فرحتي
وهاك كلبي شوفه زين كله انت
وهذا خدي الما يفارك دمعتي
جانت الدنيا ربيع
وحيل وردي الحلم جان
وجان كلبه اشكد حنون
تغير ويا الزمن كلبه
وباع نفسه وباع حبه
وصار بس الهم سلوته
يا بلوته ..
تعب من كثر الظنون
ما عرفتك .. يصير وبلحظة تغير
أنت كل البيك ما يشبهك انت
يصير غلطانه العيون!
هذا انت ابد ماتغلط اعيوني
من تشوفك شوك يحرك كلبي ويهيج شجوني
يالحبيب بليلة صرت انت الغريب
راح اسكت وارفع بيدي رايتي
وراح اذكرك .. يوم كتلك
هاك روحي وجيب ميزان السعادة وشوفها
تكفي توفي بذمتي

قيس النجم .. 2025