فجّة..!

تقي مطشر الشحماني ||

وتعني: بساط صوف، جزء من العباءة سواء كانت رجالية أو نسائية، مسافة، قطيعة بين أثنين، خصام، الضربة على الرأس مصحوبة بخروج الدم، تأتي للذم (فج) للرجل وللأنثى (فجة)، فيقال مثلاً:
1- الفِجّة كبساط يفرش على الأرض
ناس فقره والله حتى فِجّه ما عدهم يگعدون عليها
فرشولنه فِجّة صوف گعدنا عليها وتغدينا
عدهم فِجّه عتيكه معتزين بيها
2- فِجّة العباءة. وكانت العباءة التي ترتديها النساء البغداديات وخصوصا (اليهوديات) متكونة من (فجتين) توضع احدهما على الكتف والأخرى على الراس… حسدتني حماتي على فِجّة عباتي (مثل شعبي)
3- الفَجّة كمسافة …. اليروح إلهم لازم يگطع هاي الفَجّة الطويلة
4- الفَجّة كقطيعة بين الناس….. ما متصافين بينهم اكو فَجّه
5- الفَجّة: الضربة على الرأس ( الفشخة) فَجّه على راسه بطابوگه وخله دمه
بطوله
6- كأسلوب تعامل…. اسلوبه فَج ويه الناس… فد وحده فَجّه ما تنجرع
وفي الشعر:
بيدي وگرضها الفار فجة عباتي
كل هذا ما طخيت وامشي برهاتي
وهي من الفصيح: فقد ورد في (المعجم الجامع): الفُجّةُ: الفرجة بين الجبلين. الفِجاج: (جمع فج) الطريق الواسع. فجاجة كل شيء: قلة نضجه. فجاجة الفكر: سطحيته. طبعه فَج. كلمته فجة. فج الرجل: باعد بين رجليه. ( وآذن في الناس بالحج يأتونك رجالا وعلى كل ضامر يأتين من كل فج عميق) الحج- 27.
گمع… مگموع… گمعته
وهي بمعنى: خَسَرَ، فَقَدَ، رُزِءَ، خسرته، فقدته، رُزتَهُ، وتعني كذلك القليل من الماء. وكذلك يطلق على ألة ملئ القناني (المصب) الگمع، فيقال مثلاً:
فد واحد أُغُر أول ما تزوج گمع مرته
خطية وره شهر من زواجها گمعت رجلها
ما عدها حظ وره رجلها گمعت ابنها
اگعد ولك مگموع
والله ذبحونا هالمگاميع اربعة وعشرين ساعة هوستهم بالدربونه
كل شوية وحلفت: كون گمعته لأبني إذا اچذب عليكم
ما خلت واحد من اهلها ما گمعته وجه الشوم
إن شالله تگمع عزيز گلبها…. من أدعية النساء
– ما لحگت اشربلي گمع مي.
وهي من الفصيح: (القمع) مصدر، قمع الرجل يقمعه قمعا وأَقمع فأنقمع: قهره وذله فذل. والقمع: الذل. والقمع الدخول فرارا وهربا، وقُمع في بيته وأنقمع: دخله مستخفياً. وقمعه قمعاً: ردعه وكفه. (لسان العرب).
گعم
وهي كلمة تعني: نهاية الأشياء. كگعم الصمون (المگسب) وگعم البيتنجان وگعم البامية وگعم الخيار، فيقال مثلاً:
من نشتري الصمون ناكل كل الگعوم بالطريق لأن مگسبة وتشهي
أمي الله يرحمها جانت تحط گعوم البيتنجان بالمرگة
گبل الخيارة ما انذب منها شي ناكل حتى گعمها
ويطلق على الرجل القصير (گعم) وتصغيرها ( گعيم) فيقال:
(واحد گعيم هالگده) ويشار الى راحة اليد.
وهي من الفصيح: قعمة المال: خياره. (المعجم الجامع).
تبنها تبن… متبون
وهي تعني: ملأ الشيء ملئاً، والتَبن: الضرب على الخواصر، فيقال مثلاً:
اليوم چنا معزومين وما گمنا من الأكل لمن تبناها تبن
اليوم جابولنا گونية بانية تابنينها تبن
خطيه ميدري بيه وصارت التبنة على خاصرته مرده مرد
وفي الشعر الشعبي هذا الزهيري للحاج مطشر عبد النبي:
يا صاح عودي ذبل له كل دوه ما يصح
والدمع من مقلتي هل وجرى ما يصح
حتى مخلول النيب مثلي لو صحت ما يصح
من حيث مصيوب ما بين الجوانب تبن
ومعالي ويه الروح سري لما أموتن تبن
لا تنهضم للسبع لو چان علفه تبن
واليوم علف السبع حتى التبن ما يصح
وهي من الفصيح: تبن يتبن تبنا، فهو تابن، والمفعول متبون. تبن الماشية تبن تبنا: علفها التبن. (المعجم الجامع).
نَحَوَة…. يناحي
وهي كلمة جنوبية بأمتياز وكذلك تقال في الفرات الاوسط وتعني: خصومة، عراك، خلاف، عداوة، جفوة، نزاع، فيقال مثلاً:
محد يحچي ويه الاخر ابيناتهم نَحَوَة
اليوم صارت نَحَوَه بين أخوتنا
إتناحه ويه أخوه وطلع زعلان
وكح ما خله واحد ما إتناحه وياه
تناحوا ابيناتهم على ورث أبوهم
وفي الشعر الشعبي هذه الأبوذية:
على دگي يوالدتي وناحي
چنت ما ادنگ الهامة وناحي
لا تفرح يهل الشامت واناحي
أفرح لو سره اليناز بيه
وهي من الفصيح: ناحاه: صار كل منهما نحو الأخر. نحا بصره اليه: التفت إليه، رده. نحاه عنه: صرفه، أبعده، أزاله. ( المعجم الجامع).
الباگورة
وهو اسم يطلقه اهل الأهوار على أنثى الخنزير، فيقال مثلاً:
(أمشطب يبن الباگورة). ومشطب تعني: مقلم. لأن صغار الخنزيرة عند ولادتها يكون شعرها ناعم ومشطبة ثم يصبح كالابر ولون واحد، وقيل في ذلك مثل شعبي: ( مثل فروخ الخنزيرة من يطيح مشطب) ويطلق المثل على الطفل الذي يولد جميلاً ثم تغير سحنته ريح السموم ومياه الأهوار
– تگعر چنها الباگورة
ذکرها الحنفی فی معجمه الجزء الثاني: (أنثى الخنزير وهي قليلة ا