چلب الحايچ..!

سعيد ياسين موسى ||

يگولون يوم من الايام هجم ذيب على قرية وهاي القرية اغلبهم غنامة عدهم غنم ، فهرعت الچلاب ( أجلكم الله ) مالت القرية وره الذيب وهو يركض تكرمون والجلاب تركض وراه وبعد ما تعبت الجلاب رجعت للقرية إلا چلب واحد ضل يطارد بالذيب وهناك تعب الذيب …

فوگف وگال للچلب ، انت چلب صاحب الغنم ؟؟؟
گاله : لا …
الذيب گاله : أنت چلب شيخ القرية ؟؟
گاله : لا ….
گاله : انت چلب ابن الشيخ؟
گاله : لا ..
الذيب گاله : أنت لعد چلب من؟ خبلتني !
گاله : چلب الحايچ …
گاله : الحايچ عده غنم ؟؟
گاله : لا ولا صخلة عده …
گاله الذيب : زين الغنامة من يذبحون هم يطونك عظمه لحيمه؟
گاله : لا ما ينطون بس لجلابهم ………..

فگاله الذيب : ولك چلب ابن الچلب اليوم أسويك ثريد وعبرة لكل چلاب الديرة صارلك ساعة تركض وراي والحايج حتى صخلة ما عنده وكلشي ما محصل منهم !

سالفة بلا رباط ولا بتلو ..!