الوفاء في ابهى صورة ..

أحمد لعيبي

ما دام الحل بيد السماء..
شغلتنه يم ام البنين..
لأن عدها وفاء ونكران ذات
ومتصالحة مع نفسها ..
إتخيلوا امراة يكَطعون ابنها بالسيوف
وتسأل عن ابن ضرتها ان يكون
ما صابه مكروه ..
فوك كل هذا تتلكه اخته بعد القتل
وتكلها خوما قصر وياكم ..
…………
ما تكَلها ليش اخذتوا ولدي بحربكم ..؟
ما تكلها انتم غررتوا بالعباس..؟
ما تكلهم صوج قادة الطف صار بولدي هيج..؟
………..
انوب العجيب بهاي المرأة تنازلت حتى
عن اسمها ..
شايفين واحد يتنازل عن اسمه حتى ما يجرح
شخص آخر لان اسمها يشبه اسم أمه…!!
………..
طبعا ما دام الحل بيد السماء..
تدرون ابنها رفض عرض ان يسلم هو واخوته
بمقابل بس ينسحب من جيش الحسين..
شيريد ينطونه ..
وذكروه بأنهم خوال امه …!!
…………
تدرون الوفاء من يجي من العباس بهالطريقة
الشغلة مو بس صلب علي …لا وعيونكم
الشغلة بيها حليب طاهر..وكاروك ما مبيوك..!!
…………
طبعا ام البنين الانسانه المحترمة
والام الفاضلة ..الشريكة وليس المشاركة بالمصاب..!
الزهراء بيوم القيامة تجيب علامات الوفاء
لأم البنين ..
تخيلوا الزهراء ..
شلون ترد الجميل ..
بس اتصوروا وياي عليكم العباس …
تخيل الموقف ..
الزهراء تحمل كف العباس ..
مولاتي ..
خوب احملي رأس الحسين ..
خوب اضلاع الحسين ..نحر الرضيع
جسد علي الاكبر…
صورة لظهر زينب والسياط والسبي …
………..
لا لا ..
الزهرة جايبه رسالة لأم البنين
بالاخره ..يوم كلمن يكول ياروحي..
الزهرة تطالب بثأر كف العباس …
……….
………..
ملاحظة ..عذرا للاسلوب ولكنها لحظة توجه للسماء
وربما خانني التعبير والاسلوب ..
استميح ال البيت واستميحكم عذرا..
ــــــــــــــ