شعيط ومعيط..بس منو جرار الخيط؟!

ياسر الربيعي ||

اكو اخوان اثنين واحد اسمه (شعيط) والثاني اسمه ( معيط)
ذول وين مايحطونها سوده مصخمه ايدورون على شغل ماكو
هذاك اليوم شعيط كال لمعيط خويه خلي نفترق وكل واحد ايشوفله طريج ويروح بي ايدور رزقه
شعيط كان ضخم الجثه بين قوسين فحل ماطول عليكم السافه راح للملك كاله مولاي انا داخل على الله ثم عليك اريد شغل شافه الملك ضخم كاله صير حارس من حراسي
كول اشتغل شعيط هناك صار الحارس الشخصي هناك لا صار مرافق الملك ومستشاره ذاك اليوم الملك تمرض. فدز على شعيط
كاله انا ماعندي بس بنتي اريد ازوجها الك لان اخاف ايطمعون بيه بعد موتي لاتگلي ولاگلك ازوج شعيط من بنت الملك مات الملك
اجه شعيط الحرمته الي هيه وريثت العرش كله انتِ هس مكان ابوج اتلزمين الحكم كالتله انت زوجي وانت اصير بمكاني لان انا ما افهم بالسياسه ماطول عليكم السالفه شعيط صار الملك
هذاك اليوم معيط اجه ايدور على اخوه يمشي ويسأل كالوله ماكو هيج اسم بس اكو ملك اسمه شعيط وصفوا اله عرف اخوه عن طريق الوصف بس بين المصدك بين المامصدك
راحله شافه كاعد على العرش الملك شاف اخوه اتلكاه وستقبله ذاك الاستقبال كاله شلون صرت هيج كاله سالفه طويله كاله انت شلونك شنو اخبارك كاله مثل ماعفتني على نفس وضعي
كاله شعيط الملك من اليوم راح اصير وزير الي معيط ضل يبجي كاله ها ماراضي اسويك رئيس وزراء وهذا زاد بالبجي
كاله شمالك تبجي اتريد اصير بمكاني كاله لا كاله چا عليمن تبجي كاله ابجي على حال هاي الوادم الي يحكمها
شعيط ومعيط …!!
الله يساعدنا على شعيط ومعيط العراق بقينا تحت رحمتهم
وسلامتكم…
ـــــــــــ