رسالة الى / فد واحد (ترفيهي)..!
باقر الجبوري ||
يگول .. من كان ( اخو هدلة ) يحكم العراق گامت تركيا وگطت المي عن نهر دجلة والفرات وبيومها كان صدام گاعد عالشط !!
فصدام غضب ووگف على حيله وهددهم وگال ( الان وصلوها لتركيا كون تفتح المي من السدود وينترس الشط قبل ما اخلص جگارتي الچروت … وإلا )!
وطبعاً .. الرسالة وصلت لتركيا !!
والاذاعة والتلفزيون گامت تبث الاغاني الوطنية ( ياكاع ترابچ كافوري ) و( يمه يماه يمه للوطن ياروح جودي ) و( ياحوم اتبع لو جرينا ) و( فوت بيها وعالزلم خليها )!
فتركيا انخبصت وحارت شتسوي !
فقسم منهم طب للملاجيء وقسم منهم فروا للخارج وقسم اخر انتحروا من فوگ العمارات او شنروا رواحهم على سچة القطار لحد نص الاتراك ماتوا !!
وبوكته وصلت أخبار ان مراد علم دار وعبد الحي وعمران ميماتي سلموا نفسهم للسفارة العراقية بتركيا واعلنوا عن إنشقاق وزارات الدفاع والداخلية والامن والمخابرات التركية وتأييدها لكل مايصدر من الحكومة العراقية !!
أي لعد شحسبالك خالي هذا صدام !
وإذا قال صدام … فقد قال العراق !!
المهم حبيبي .. صدام رجع وگعد عالشط وشعل جگارته الامريكية بشخاطة دجلة العراقية وقبل ماتخلص گامت تركيا وفتحت السدود ( لان تركيا تعرف كلش زين ان صدام فد واحد مخبل ويسويها ) ودزت عالسريع الشيف ( بوراك ) حتى يطبخ مشويات للرئيس !!
وفجأة انترس الشط بالمي والروج يطگ بالروج !
فصار الرئيس يضحك ويهز بچتوفه وگال ( ها شگلتلكم همه يخافون مني )!!
وعاشوا عيشة سعيدة !
وخلفوا صبيان وبنات !!
والشعب طلع يهوووس بالشوارع ( هالهولة للبعث الطامس )!!!
رواها بسند صحيح شقاوة بغداد ( طه ياسين رمضان ) عن العرگچي ( طارق عزيز ) عن أبو الثلج ( عزة الدوري ) عن العريف ( عبدحمود ) وصححها البخاري ومسلم وأبن ماجة !!
أگول .. انت تعرف تقرا لو غبي حالك من حال البعثية !
هذا صاحبك صديم كان أجبن من ( إسماعيل ياسين ) وكان يتوسل بالجامعة العربية بلكت يلگوله حل وي
تركيا حتى لا تخترق سيادة الحدود العراقية !
انت نايم لو گاعد !!
تحياتي .. باقر الجبوري
اقرء ايضاً
