العتاكة.. نعم نحن العتاكة..!

قاسم آل ماضي ||

بزمن هدام .. وتحديداً بالتسعينات هدام طلب من عزة الدوري گاله منروح جوله تفقديه للاسواق .. هذا عزة يدري العالم مطحونه طحن من الحصار والمعلم راتبه

تلث تالاف يعني يجيبله فقط ( ٣ كيلوات طحين ) گله سيدي الوقت غير مناسب گله لا ابو العز لازم نروح ..
المهم وصلوا للسوگ شافوا شاب عنده غراض ومتحمس للبيع ..
اجه يمه ابو الحفر ..

گاله .. شجاي اسوي ابني ..
الشاب گاله سيدي جاي اشتغل بالسوگ ابيع واشتري . ..
ابو الحفر گله ( عفيه… عفيه ) شنو تبيع وشنو تشتري ؟
گاله والله سيدي ابيع بغراض البيت واشتري طحين ..

هسه ولا هذا الدوني الي يسمي ضحايا النظام الذين طبق عليهم النظام كل سياسات الجوع والقمع وزج بهم بحروب خاسره لا ناقة لهم فيها ولا جمل ..

يسميهم( عتاگه).. ونسى ان سيده الكلب هو من اوصلهم لذلك..
الى هنا عادي ماكو مشكله هؤلاء أناس جبلوا على اضطهاد وتحقير خصومهم وخصوصاً الشروگية ..
ولكن المشكلة والطامة الكبرى ان يصدر مثل هذا الكلام والحكومة والبرلمان وكل اجهزة الدوله يشكل فيها الشروگيه اكثر من نص زائد واحد …

٩٩.٩ % من سياسي الشيعة مر عليهم هذا الكلام مرور الكرام .. لأنهم ينظرون للعتاگ بطاقة انتخابية يحتاجها كل اربع سنوات يعني تمام مثل السايق بالكراچ يشوفك كروه ..

والله ان اذناب البعث والطائفيين ان عادوا للحكم سيجعلون من جرائم هدام مجرد بروفة ..