السوداني لم ينجح بعد..لا تستعجل بالحكم ..!

عدنان فرج الساعدي ||

افتتاح شارع .. مشاريع لفك الاختناقات في بغداد والمحافظات ( لم تبدأ بعد بشكل حقيقي )
إفتتاح وزيارة مشاريع مستمرة من الحكومات السابقة .. الله لا يوفقني .. كافي .. هذه كلها ما تؤكل خبز للعراقيين .. كلي ليش …
راح أكلك ليش؟
أخي العزيز .. دعك من قانون الامن الغذائي الطارىء … فلوسه راحت للمحاضرين والمشاريع المتوقفة والبطاقة التموينية والجهد الخدمي والفلاحين
عزيزي الحكومة اتخذت قرارات شعبوية لا تتخذها أي حكومة ذات مسؤولية أمام شعبها
اولا رجعت خفضت سعر الصرف فخسرت ١٣ ترليون و٥٠٠ مليار دينار عراقي في قرار أقل ما يوصف به إنه غبي وغبي للغاية ( إيراد غير نفطي )
ثانياً.. الغت ضريبة كارتات الموبايل فخسرت ٥٦٠ مليار دينار عراقي وهو قرار غبي ايضا .. ( إيراد غير نفطي )
ثالثاً القرار الغبي الثالث .. هو رفع حجب البطاقة التموينية لمن راتبه مليون و٥٠٠ الف دينار الى مليوني دينار ؟؟؟
زين دشيل منه الطحين … السكر أي مادة أخرى
زين لما أنت تفكر لهذا ابو المليون ونص .. خطية .. زين هاي الفقراء باطراف المدن مو كاتله الضيم ..
أشو هذولة مشمورين محد الهم
زين انت محدد سعر النفط في الموازنة وما ماخذ بنظر الاعتبار اي نزول مفاجىء … علما ان سعر نفط برنت يزيد عن سعر النفط العراقي من ٦ الى ٨ دولار ؟؟؟
واجت اوبك خفضت نسبة التصدير مالتنه .. وجيب ليل واخذ عتابه …
والله اذا نزل النفط مثلا الى ٥٠ دولار
الا اتصير كارثة غير مسبوقة .. اتصور دولة عدها موظفين بس ما تكدر تنطيهم رواتب ؟؟؟
ولحد اليوم .. لا السوداني ولا الاطار اللي هم لازمين الحكومة .. ما اتخذوا قرار. بخصوص خسائر الكهرباء السنوية .. بحدود ١٠ مليار دولار سنويا .. وباقي الفقراء على حالهم .. والحكومة تعين موظفين
وتيار الفراتين يخطط لاكتساح الساحة في الانتخابات المقبلة
مع احترامي الشديد .. للمصفقين للسوداني بدون حساب
أخي اصفق له عندما يقوم بقرار ناجح
وأقف ضده وضد الاطار لما أشوف .. فلوسنا رايحة ( بولة بشط )
اذا بقينا بدون ستراتيجية وتخطيط مركزي


ــــــــــــــــــــــ